鳥仔 ê 名：線頂台語鳥仔名冊

《鳥仔 ê 名：線頂台語鳥仔名冊》是一個專為鳥仔台語系統化號名 ê 網頁。

想欲認捌鳥仔 ê 台語，定定會遇著 2 个坎站。

第 1 關是認捌基本、時常看著 ê 鳥仔，譬論：長尾山娘、暗光鳥、青笛仔，一般人若會曉認、會曉講已經是誠厲害矣。

毋過隨著對鳥仔愈來愈熟似，你會發現，其實誠濟鳥仔攏無適當 ê 台語名通用，誠濟鳥仔名嘛干焦是通稱。無像英語、華語、日語按呢，有系統化討論號名，逐冬發佈名冊、增加新名。這就是第二關。

有這个問題 ê 原因是，現代鳥類分類研究主要是以華語系統做中心。真濟鳥仔 ê 台語名猶原停留佇日本時代，無法度配合上新 ê 分類研究。

仝款一个台語俗名，過去可能干焦對應一个物種；毋過因為研究進步，這馬才知影其實包含幾若種無仝 ê 物種，煞揣無適合 ê 名來分別討論。

為著補紩這个空缺，《鳥仔 ê 名：線頂台語鳥仔名冊》根據上新 ê 鳥類分類研究佮號明理路，系統化為臺灣本土鳥仔號名，向望未來會當建立一本以台語為主 ê 鳥仔名冊。

澳洲水尖仔飛6千公里遠來臺今臺南揣著影跡

圖：澳洲水尖仔飛6千公里遠來臺今臺南揣著影跡

來看這个範例，「水尖仔」是一般鷸科鳥仔 ê 通稱，有真濟物種攏會使叫水尖仔，這个是水尖仔、彼个嘛是水尖仔，若是用台語講，會毋知影到底是佗一个物種，除非改用華語講「黦鷸」。

《鳥仔 ê 名：線頂台語鳥仔名冊》ê 目標就是欲去解決這个問題。若是依據伊 ê 外觀形體，叫伊「âng-io-thôo-lâng-kau-u̍t 紅腰土礱鉤鷸」仰是「âng-io-thôo-lâng-kau-á 紅腰土礱鉤仔」著會非常清楚，嘛會當用台語佮其他 ê 水尖仔討論形體、外觀。

號名理路 hō-miâ lí-lōo

若是有台灣本土 ê 台語俗名，代先使用。
若是台灣本土 ê 台語俗名是通稱，但是毋但一个物種，參考英語、日語、華語 ê 用法，頭前加形容詞區別。
若揣無台灣本土 ê 台語俗名，代先檢查敢有日本時代留落來 ê 稱呼；若無，原則上盡量尊重中華野鳥協會公告 ê 華語台灣鳥類名錄命名。毋過因為華語 ê 用法不一定對同台語 ê 氣口，所以嘛會參考英語、日語、鳥仔 ê 形體外觀、色水號名。
分類名盡量用台灣本土 ê 台語號名。
羅馬字、漢字使用教育部用字。

請依政府正式發佈 ê 台語名為主，譬論：公視台語台 - 台語新詞辭庫、教育部臺灣台語常用詞辭典。

下跤 ê 物種攏是青笛仔

斯氏繡眼 -> su-sī-tshenn-thî-á 斯氏青笛仔
日菲繡眼 -> ji̍t-hui-tshenn-thî-á 日菲青笛仔
低地繡眼 -> kē-tē-tshenn-thî-á 低地青笛仔
紅脇繡眼 -> tshiah-koh-tshenn-thî-á 赤胳青笛仔

鳥仔名 ê 註解

◆：建議做這个物種 ê 台語名。
◇：其他 ê 名。
△：通稱 ê 符號，有二個以上 ê 物種攏會使叫這个名。

重要 ê 參考

📕 上新 ê 分類參考 eBird kah eBird Taiwan鳥類名錄 2025.10 (製表：eBird Taiwan))。
📕 台語俗名參考《Hîng guá Tâi-uân Tsiáu-á Miâ（還我台灣鳥á名）》 kah 《台灣野鳥鄉土名》。
📕 華語俗名參考 eBird 佮台灣生物多樣性網絡。
📕 台語字參考 ChhoeTaigi 台語辭典佮教育部臺灣台語常用詞辭典。
📕 鳥仔 ê 外觀參考 The Sibley Field Guide by David Allen Sibley。
📕 鳥仔冊參考台灣野鳥手繪圖鑑(二版)。
📕 鳥仔圖使用 iNaturalist 面頂 ê CC0、CC-BY、CC-BY-NC 授權。
人名翻譯部分參考 Lohankha外來語音譯系統

聯絡我

這个網站大部分是利用下班有閒 ê 時間來寫，所以翻新 ê 速度較慢。若有發現寫毋著 ê 所在，抑是有建議 ê 名，請寫電子批共我講，我會盡量揣時間來改，請手梳攑懸，多謝！

✉️ 電子批: minsiansu@gmail.com
📸 相片冊: siansiansu