鳥仔 ê 名：現代鳥仔名台語新詞討論

為著予逐家認捌鳥仔 ê 台語，我整理這份清單，方便逐家查對鳥仔 ê 台語名。這个網站依據上新 ê 鳥類分類研究佮號明理路，盡量為逐種鳥仔揣適合 ê 台語名，向望藉著認捌鳥仔名，做伙來感受台語 ê 媠。

為何欲創作《鳥仔 ê 名：現代鳥仔名台語新詞討論》？

隨著中國國民黨來台，迫害本土語言 ê 發展，現代鳥類分類研究主要是依華語為主，真濟鳥仔 ê 台語名猶原停留佇日本時代，無法度配合上新 ê 分類研究，辭典內底嘛揣無。

仝款一个台語俗名，過去可能干焦知影一个物種，毋過因為研究 ê 進步，這馬才知影毋但一个物種，紲攏無合適 ê 俗名來討論。若是以前毋是佇台灣生活 ê 鳥仔，抑是外國 ê 物種，可能嘛揣無合適 ê 台語名通叫。

閣來是因為市面上 ê 鳥仔名冊主要是使用華語，用台語寫 ê 誠少，為著補紩這 ê 空缺，《鳥仔 ê 名：現代鳥仔名台語新詞討論》依現代分類學 ê 角度，重新看待台灣本土 ê 鳥仔名，內底包含真濟台語新詞 ê 創作，目的是鼓勵咱去揣看覓，敢有較適合鳥仔物種 ê 台語名，向望未來會當有 1 本台語為主 ê 鳥仔名冊。

圖：澳洲水尖仔飛6千公里遠來臺 今臺南揣著影跡

來看這个範例，「水尖仔」是一般鷸科鳥仔 ê 統稱，有真濟物種攏會使叫水尖仔，這个是水尖仔、彼个嘛是水尖仔，若是用台語講，會毋知影到底是佗一个物種，除非改用華語講「黦鷸」。

《鳥仔 ê 名：現代鳥仔名台語新詞討論》ê 目標就是欲去解決這个問題。若是依據伊 ê 外觀形體，叫伊「âng-io-thôo-lâng-kau-u̍t 紅腰土礱鉤鷸」仰是「âng-io-thôo-lâng-kau-á 紅腰土礱鉤仔」著會非常清楚，嘛會當佮其他 ê 水尖仔區分。

號名理路 hō-miâ lí-lōo

1. 若是有台灣本土 ê 台語俗稱，代先使用。
2. 若是台灣本土 ê 台語俗稱是統稱，但是毋但一个物種，參考英語、日語、華語 ê 用法，頭前加形容詞區別。
3. 若揣無台灣本土 ê 台語俗名，原則上盡量尊重中華野鳥協會公告 ê 華語台灣鳥類名錄命名。毋過因為華語 ê 氣口不一定對同台語 ê 用法，所以嘛會參考英語、日語、鳥仔 ê 形體外觀、色水號名。
4. 分類名盡量用台灣本土 ê 台語號名。
5. 羅馬字、漢字使用教育部用字。

範例 1

下跤 ê 物種攏是青笛仔

1. 斯氏繡眼 -> su-sī-tshenn-thî-á 斯氏青笛仔
2. 日菲繡眼 -> ji̍t-hui-tshenn-thî-á 日菲青笛仔
3. 低地繡眼 -> kē-tē-tshenn-thî-á 低地青笛仔
4. 紅脇繡眼 -> tshiah-koh-tshenn-thî-á 赤胳青笛仔

範例 2

下跤 ê 物種攏是水避仔 ê 一種

1. 小鸊鷉 -> tsuí-pī-á 水避仔
2. 角鸊鷉 -> kak-tsuí-pī 角水避
3. 赤頸鸊鷉 -> âng-kún-tsuí-pī 紅頸水避
4. 冠鸊鷉 -> tshàng-moo-tsuí-pī 聳毛水避
5. 黑頸鸊鷉 -> oo-kún-tsuí-pī 烏頸水避

範例 3

下跤 ê 物種攏無佇辭典

1. 鐵嘴鴴仔 -> kāu-tshuì-hîng-á 厚喙鴴
2. 赤腹鶇仔 -> âng-pak-tong-á 紅腹鶇
3. 勘察加柳鶯 -> Kham-tshat-ka-liú-ing 勘察加柳鶯
4. 紅喉潛鳥 -> âng-âu-tshàng-tsuí-tsiáu 紅喉藏水鳥

範例四

有 ê 物種 mā 會參考日語、英語，無一定參考華語

1. 褐翅鴉鵑 -> tuā-tsháu-kok 大草嘓
2. 斑背潛鴨 -> lîng-ah 鈴鴨
3. 蠣鴴 -> tsia̍h-ô-á-tsiáu 食蚵仔鳥

範例五

分類名盡量用台灣本土 ê 台語號名

1. 夜鷹目 -> tsio̍h-ki-á-ba̍k 石磯仔目
2. 鸊鷉科 -> tsuí-pī-á-kua 水避仔科
3. 秧雞科 -> bí-ke-á-kua 米雞仔科
4. 水雉科 -> lîng-kak-niû-kua 菱角鳥科
5. 草鴞科 -> kâu-bīn-ing-kho 猴面鷹科

鳥仔名 ê 註解

• 🎯：推捒做為這个唯一物種 ê 台語俗名。
• ✳️：統稱 ê 符號，有二個以上 ê 物種攏會使叫這个名。

重要 ê 參考

• 📕 上新 ê 分類參考 eBird kah eBird Taiwan鳥類名錄 2025.10 (製表：eBird Taiwan))。
• 📕 台語俗名參考 《Hîng guá Tâi-uân Tsiáu-á Miâ（還我台灣鳥á名）》 kah 《台灣野鳥鄉土名》。
• 📕 華語俗名參考 eBird 佮台灣生物多樣性網絡。
• 📕 台語字參考 ChhoeTaigi 台語辭典 kah 教育部臺灣台語常用詞辭典。
• 📕 鳥仔 ê 外觀參考 The Sibley Field Guide by David Allen Sibley。
• 📕 鳥仔冊參考台灣野鳥手繪圖鑑(二版)。
• 📕 鳥仔圖使用 iNaturalist 面頂 ê CC0、CC-BY、CC-BY-NC 授權。
• 人名翻譯部分參考 Lohankha外來語音譯系統

聯絡我

這个網站大部分是利用下班有閒 ê 時間來寫，所以翻新 ê 速度較慢。你若有發現寫毋著 ê 所在，抑是有建議 ê 名，請寫電子批共我講，我會盡量揣時間來改，請手梳攑懸，多謝！

• ✉️ 電子批: minsiansu@gmail.com
• 📸 相片冊: siansiansu